- अर्थ सरोकार सुदूरपश्चिम ब्युरो
धनगढी । किसान बहुउद्धेश्यीय सहकारी संस्थाले टीकापुर अस्पताललाई अक्सिजन सिलिण्डर हस्तान्तरण गरेको छ । कैलालीको लम्कीमा केन्द्रिय कार्यालय रहेको किसान बहुउद्देश्यीय सहकारी संस्थाले अस्पताललाई १०० वटा अक्सिजन सिलिण्डर रिफिल गरेर हस्तान्तरण गरेको हो ।
सोमबार अस्पतालका डाक्टर रमेश उपाध्यायलाई सिलिन्डर हस्तान्तरण गरेको संस्थाका संचालक समिति सदस्य सरोज कुमार शाहले बताए । किसान सहकारीले कोरोना भाइरस (कोभिड १९) को दोस्रो भेरियन्टबाट प्रताडित बिरमीहरुलाई सहज अक्सिजन आपुर्तिका लागि किसान अक्सीजन बैंक सन्चालनमा ल्याई उक्त बैंक मार्फत सेती प्रादेशिक अस्पताल धनगढी, टीकापुर अस्पताल र लम्की अस्पताललाई अक्सिजन आपुर्ति गर्दै आएको सन्चालक सदस्य सरोज कुमार शाहले बताए । सोमबार सम्म टीकापुर अस्पताललमा अक्सिजन आवश्यकता भएका ३२ जना कोभिडका बिरामीहरुको उपचार भईरहेको अस्पतालले जनाएको छ ।
सहकारी संस्थाले संचालन गरेको अक्सीजन बैंकले यस अघि लम्की अस्पताललाई १५० थान रिफिल सिलिन्डर उपलब्ध गराई सकेको छ । स्थानिय अस्पतालहरुमा सिलिन्डर अभाव हुननदिन संस्थाले अन्य संस्थासंगको सहकार्यमा खाली सिलिन्डर खरिद प्रक्रिया अघि बढाएको संस्थाका महाप्रबन्धक डम्बर बहादुर शाहले जानकारी दिएका छन् ।
