- अर्थ सरोकार सुदूरपश्चिम ब्युरो
धनगढी । कैलालीमा एक युवकको शव फेला परेको छ । जिल्लाको धनगढी उपमहानगरपालिका वडा नम्बर ५ शिवनगर र जाई जोड्ने सडक नजिक अन्दाजी ३५ वर्षीय युवकको हत्या गरेर फालिएको अवस्थामा फेला परेको हो ।
शवको गालापट्टीको भाग र कंचटमा चोट लागेको देखिएको कैलाली जिल्ला प्रहरी कार्यालयका प्रहरी नायव उपरीक्षक बेद प्रकाश जोशीले बताए । उनले भने, ‘शव नजिकै रगत लागेको काठको टुक्रा पनि भेटिएको छ ।’
घटनास्थलको अवस्था हेर्दा अन्यत्र हत्या गरेर त्यहाँ शव फालेको हुन सक्ने जोशीले बताएका छन् । घटनाबारे तालिमप्राप्त कुकुरको प्रयोग गरिएको भएतापनि थप प्रमाण हात नलागेको उनले बताए । उनले भने, ‘हाम्रो अनुसन्धान जारी छ, छिट्टै हत्यारासम्म पुग्छौँ ।’
सोमबार बिहान पौने दश बजेतिर युवकको शव देखेपछि प्रहरीलाई एक युवतिले खबर गरेकी थिईन । शव फेला परेको युवकको अहिलेसम्म पहिचान खुल्न सकेको छैन । शवको प्रकृति हेर्दा बिहान युवकको हत्या भएको हुन सक्ने जिल्ला प्रहरी कार्यालय कैलालीको अनुमान रहेको छ ।
