- अर्थ सरोकार सुदूरपश्चिम ब्युरो
धनगढी । धनगढी उपमहानगरपालिका वडा नम्बर १८ को कार्यालयमा लागेको ताला खुलेको छ । मंगलबार आन्दोलनरत रामप्रसाद चौधरी र वडा अध्यक्ष भुवन रिजालबीच सहमति भई ताला खोलिएको हो । पाँच वर्षदेखि कार्यालयमा कार्यालय सहयोगी (का.स)को भुमिका निर्वाह गरिरहेका रामप्रसाद चौधरीले आफुलाई कामबाट निकालेको भन्दै भदौ २ गते कार्यालयमा तालाबन्दी गरेका थिए । वडा कार्यालय र आन्लदोलनरत पक्षबीच समहमति हुन नसक्दा १ हप्तादेखी ताला खुलेको थिएन, तर मंगलबार दुईपक्षबीच भएको आपसी समझदारीका आधारमा ताला खोलिएको वडा अध्यक्ष भुवन रिजालले बताएका छन् ।
‘नगरसभाको बैठकले गरेको निर्णयका आधारबाटै हामी प्रक्रियामा गएका थियौँ । तर केही राजनीतिक दलका नेताहरुको उक्साहटमा आएर चौधरीले कार्यालयमा तालाबन्दी गरे’, अध्यक्ष रिजालले भने, ‘मैले उनीसँग व्यक्तिगत रुपमा कुरै गर्न पाईन । राजनीतिक दलको ठुलो आवाजले सामान्य समस्यालाई बढावा दियो । अहिले हामीबीच सहमति भएको छ, र सोहीका आधारमा आज ताला पनि खोलिएको छ ।’ सहमतिका आधारमा कर्मचारी व्यवस्थापनको विषयमा नगरपालिकाले अर्को व्यवस्था नगर्दासम्मका लागि कार्यालयमा चौधरीलाई यथावत् राख्ने अध्यक्ष रिजालले बताएका छन् ।
यता आन्दोलनरत चौधरीले माग र हल्लाबीच उत्पन्न भएको गलत बुझाईले भ्रम सृजना गरेको बताएका छन् । आफ्नो माग धेरै ठुलो नभएपनि राजनीतिक दल तथा आन्दोलनमा उत्रिएको भिडले मुद्धालाई ठुलो बनाएको चौधरीले बताए । ‘माग र हल्लाको बीचमा अन्यौलता सृजना भयो । मैले नगरपालिको पत्र अनुसार वैकल्पिक व्यवस्थापन नहुँदासम्म १ महिनाका लागि काममा राख्नुस भनेको थिंए, तर उहाँले १ वर्ष बुझ्नु भएछ’, अर्थ सरोकारसँग कुराकानी गर्दै चौधरीले भने, ‘आज व्यक्तिगत रुपमा उहाँसँग कुरा भयो । हामीबीचको गलत बुझाईलाई चिर्दै सहमति भएर ताला खोलिएको हो ।’
वडा कार्यालय र चौधरीबीच भएको सहमतिका अनुसार कर्मचारी व्यवस्थापनका विषयमा नगरपालिकाले अर्को निर्णय नगर्दासम्म उनी कार्यालयमा कासकै भुमिकामा रहनेछन् ।
