- अर्थ सरोकार सुदूरपश्चिम ब्युरो
धनगढी । धनगढी लायन्स क्लब अफ धनगढी इन्नोभेटिभले अछामका पहिरो पीडितलाई खाद्यान्न सहयोग गरेको छ । विपदको समयमा नागरिकको स्वास्थ्य सुरक्षारार्थ आवश्यक सहयोग संकलन गरी पहिरो पीडितका लागि खाद्यान्न पठाएको क्लबका वरिष्ठ उपाध्यक्ष अर्जुन रावलले बताएका छन् ।
‘मानव भईसकेपछि मानवताको भावना सबैमा हुनुपर्छ । आज अछाममा परेको विपत्ती भोली हामीलाई पर्दैन भन्न सकिँदैन । अहिले अछामका पहिरो पीडितलाई सहयोगको खाँचो छ ।’ रावलले भने –‘यस्तो परिस्थितिमा हामीले सबैले व्यक्तिगत स्वार्थभन्दा माथि उठेर सहयोग गर्नुपर्छ । यो मानवता मात्र होईन, सामाजिक दायीत्व पनि हो । अहिले हामीले केही आवश्यक खाद्यान्न सामाग्रि पठाएका छौँ । आवश्यक परे थप सहयोगका लागि पहल गर्नेछौँ ।’
क्लबले आइतबार ३० हजार मूल्य बराबरको चामल, सोयावरी, चिउरा, दाल र भुजा पहिरो पीडितका लागि भन्दै उद्योग वाणिज्य संघ कैलालीलाई हस्तान्तरण गरेको हो । सामान ग्रहण गर्दै उद्योग वाणिज्य संघ कैलालीका अध्यक्ष पुष्पराज कुँवरले अछामका पहिरो पीडितका लागि यो सहयोग ठूलो राहत हुने बताए ।
‘यो विपत्तीमा उहाँहरुले गरेको सहयोगका लागि धन्यवाद । यो सहयोग हामी पहिरो पीडितसम्म पुर्याउनेछौँ’, उनले भने, ‘यो सँगै हामी थप सहयोग जुटाउने प्रयासमा लागिरहेका छौँ । यो विपत्तीमा सबैले आफ्नो दायीत्वबोध गर्नुपर्छ र सरकारले पनि यी पहिरो पीडितको दर्दनाक अवस्थालाई गम्भिरतापुर्वक सम्बोधन गर्नुपर्छ ।
शुक्रबार राती अविरल वर्षापछि गएको पहिरोले अछामको तुर्माखाँद, ढकारी, ढुंगाचाल्ना, कमलबजार, डुंगालामा र हात्तीबाँझको स्वरुप फेरेको छ । पहिरोमा परी २३ जनाले ज्यान गुमाएका छन् भने धेरै परिवार घरबारविहीन भएका छन् ।
