- भुमिदत्त तिवारी/अर्थ सरोकार सुदूरपश्चिम ब्युरो
धनगढी । धनगढी उपमहानगरपालिका वडा नम्बर १४ मा व्यवस्थित शौचालय नहुँदा सेवाग्राहीहरु मर्कामा परेका छन् । वडा कार्यालयको नयाँ भवनमा सुविधासम्पन्न शौचालय निर्माण भएको भए पनि उचित सरसफाई र व्यवस्थापन हुन नसक्दा सेवाग्राहीहरु समस्यामा परेका हुन् ।
यसो त वडा नम्बर १४ को नवनिर्मित भवनमा तीन वटा सुविधासम्पन्न शौचालय निर्माण गरिएका छन् । तर, उचित सरसफाई र रेखदेख नहुँदा लाखौँ खर्च गरेर निर्माण गरिएका शौचालय प्रयोगविहीन भएका छन् ।
हाल वडा कार्यालयमा सेवाग्राहीका लागि तीनवटा शौचालय प्रयोगमा छन् । तर, ती शौचालयका धारा पनि भाँच्चिएपछि सेवाग्राहीहरु शौच गर्नकै लागि घरघरै जानुपर्ने बाध्यता रहेको सेवाग्राहीहरुको गुनासो रहेको छ । यसो त शौचालय सफा मात्रै छैनन्, बरु सुविधासम्पन्न भनिएका शौचालय पनि गुट्का, पातपतिंगर तथा चाउचाउ र बिस्कुटका खोलले भरिएका छन् । जसले गर्दा शौचालय प्रयोग गर्नै नसकिने अवस्थामा पुगेको छ ।
यता उक्त विषयमा बुझ्न खोज्दा वडा नम्बर १४ का अध्यक्ष मान बहादुर विष्ट भने बोल्न मानेनन् । बरु ‘ठिकै त छ’ भन्दै पन्छिन खोजे । लाखौँको संरचना प्रयोगविहीन हुँदा र प्रयोगमा भएकैको पनि सरसफाई र व्यवस्थापन गर्न नसक्दा दैनिक वडा कार्यालय पुग्ने सेवाग्राहीहरु समस्यामा परेका छन् ।
